Wat ons glo

Die Heilige Christelike Bybel, bestaande uit die ses-en-sestig Boeke van die Ou en Nuwe Testamente, is die volledige en finale geskrewe openbaring van God aan die mensdom en is in sy totaliteit die geïnsipireerde en geopenbaarde Woord van God. Dit is kragtig, met sy eie inherente gesag en is die finale maatstaf en outoriteit in alle sake van geloof en optrede. Die Bybel is volledig betroubaar, vertrouenswaardig en waar, sonder foute.

In eèn God wat van ewigheid tot ewigheid bestaan in drie persone: Vader, Seun en Heilige Gees.

Dat Jesus Christus ontvang is van die Heilige Gees, gebore is uit die maagd Maria en dat Hy waarlik God en waarlik mens is.

Dat God die mens na Sy eie beeld geskape het, dat die mens gesondig het en dat daardeur die straf van die dood – beide fisies en geestelik – oor die mens gekom het; en dat alle mense in sonde ontvang en gebore is.

Dat die Here Jesus Christus gesterwe het vir ons sondes, ‘n plaasvervangende offer volgens die Skrif; en dat almal wie in Hom glo, geregverdig word op grond van Sy vergote Bloed.

In die liggaamlike opstanding van die Here Jesus, Sy opvaarding na die hemele en Sy huidige lewe as ons Hoëpriester en Advokaat.

In die persoonlike wederkoms van Here Jesus Christus.

Dat almal wat die Here Jesus in geloof ontvang, wedergebore word uit die Heilige Gees en daardeur kinders van God word.

In die opstanding uit die dode van beide die regverdige en die onregverdige, die ewige seën van die gereddenes en die ewige verbanning van hulle wat die aanbod om redding verwerp het.

Dat die een ware Kerk bestaan uit die totaal van hulle wat verlos is deur Jesus Christus en wedergebore is deur die werking van die Heilige Gees en dat daarom die wedergeboorte en persoonlike belydenis van Christus, noodsaaklik is vir Kerk lidmaatskap.

Dat die Here Jesus Christus twee sakramente ingestel het: die Doop van die Gelowige en die Heilige Nagmaal; wat onderhou moet word. Die Doop van die Gelowige is die onderdompeling van die gelowige in water as ‘n belydenis van sy identifikasie met Christus in Sy dood en opstanding. Die Heilige Nagmaal is deelname aan die eet van die brood en drink van die wyn as simbool van die Redder se gebreekte liggaam en Sy gestorte bloed, om onderhou te word totdat Hy weer kom.

Het jy ook al gewonder wat mens kan doen om jou geloofslewe ryker en meer sinvol te maak? Ons het daaroor nagedink en tot die slotsom gekom dat ons net sinvol kan doen as ons dit bou rondom die opdrag in

Deu 6:6-7  En hierdie woorde wat ek jou vandag beveel, moet in jou hart wees;  (7)  en jy moet dit jou kinders inskerp en daaroor spreek as jy in jou huis sit en as jy op pad is en as jy gaan lê en as jy opstaan.

AOV

Daar is verskeie hoogtepunte in die internasionale Christelike kalender wat ons oorweeg het hiervoor. Ons het die beste praktyke (‘best practises’) hieruit geneem en ons gemeentekalender daarmee gevul. Hierna het ons dit beproef (nadat ons dit vir ons gemeente se persoonlike kultuur aangepas het) en gevind dat dit goed werk beide vir volwassenes en kinders.

Hoewel die onderhouding van hierdie dae nie noodwendig deel vorm van ons geloofsbelydenis nie, voel ons dat die viering van hierdie dae juis ‘n praktiese en sinvolle wyse is om ons lewende geloof na die volgende geslagte oor te dra. Dit sou egter nie per se ‘n sonde wees om dit nie te vier of te onderhou nie; ons einddoel is bloot dat dit ‘n beproefde wyse is om ons geloof lewend te hou en op ‘n praktiese wyse aan ons kinders te leer.

• Die Lydenstyd of Lent (gewoonlik Feb/Maart) is die 40 dae wat Goeie Vrydag voorafgaan. Ons gemeente vier dit deur ‘n gedeeltelike vas vir hierdie 40 dae. Dit werk so: jy kies een of meer items om te vas gedurende hierdie tyd (bv. as jy ‘n koffie-verslaafde is, vas jy koffie). Die geld wat jy bespaar gedurende hierdie wat jy aan jou ‘vas-item(s)’ sou spandeer het, word dan na afloop van Paasnaweek aan ‘n liefdadigheidsprojek van die gemeente se keuse geskenk. Ons begin die Lydenstyd tradisioneel met ‘n Pannekoek aand op die Dinsdagaand voordat die Lydenstyd begin. Die pannekoek is simbolies van die suurdeeg van sonde wat ons uit ons lewens moet verwyder. Die volgende dag, die Woensdag, staan bekend as Ash Wednesday en dit is die formele begin van die Lydenstyd, wat ons inlei deur ‘n Lofprysing en Aanbiddingsaand.
• Paasnaweek, wat Goeie Vrydag en die Opstandingsdag Maandag insluit, word dan 40 dae later gevier volgens die internasionale Christelike kalender deur eredienste te hou en hierdie dae sover moontlik as vakansiedae te onderhou. Ons werk hard aan ‘n skedule vir ‘n gemeente paaskamp wat ons moontlik volgende jaar wil aanbied.
• Hemelvaartdag word steeds gevier deur ons gemeente, hoewel dit nie meer deur die regering as ‘n amptelike vakansiedag erken word nie. Sommige gemeentelede vier dit wel as ‘n vakansiedag deur verlof te neem.
• Pinkster (die woord is afgelei van die griekse woord ‘Penta’ wat vyftig beteken) word 50 dae later saam met Christene wêreldwyd gevier as herdenking van die gebeurtenis in Handelinge 2, toe die Heilige Gees vir die eerste keer op mensevlees uitgestort is volgens Christus se belofte. Ons vier dit deur ‘n reeks Pinksterdienste en lofprysing/aanbiddingsaande te hou gedurende hierdie tyd.
• Die volgende hoogtepunt op ons kalender is die Loofhuttefees (Sept/Okt) ter erkenning aan die profesie in Sagaria 14:16-19. Ons vier dit deur as ‘n gemeente bymekaar te kom op die Saterdagmiddag voor die Sondag die naaste aan die Loofhuttefees en ons slaap dan almal daardie aand oor in tente of in tydelike skuilings. Ons kuier en eet lekker saam, sing saam en vertel kampvuurstories voordat ons lekker in ons tente gaan slaap. Die naweek word dan afgesluit met ‘n kort buitelug diens die volgende (Sondag) oggend voordat almal uitmekaargaan vir die groot afpak en regmaak vir die week wat voorlê.
• Advent, (gewoonlik van 1 Des af) wat Kersfees voorafgaan, is hoofsaaklik ‘n aftelling om ons, maar veral ons kinders, voor te berei vir die herdenking van Christus se geboortedag (ons weet dat baie mense glo dat Christus nie werklik op hierdie dag gebore is nie, maar ons verstaan nie hulle punt nie – so what?). Die eredienste fokus ook op hierdie aftelling en daar is verskeie maniere hoe ons gemeentelede dit doen.
• Kersfees is die laaste dag op die Christelike kalender vir die jaar en i.p.v. die kommersiële Kersvader verhale, gebruik ons hierdie tyd om aan ons kinders die wonder van Christus se geboorte te leer, asook deur al die Kersverhale wat in die Evangelies opgeteken is, aan mekaar te vertel.

Ons verduidelik ons posisie rondom Kersfees breedvoerig op ons blog. Jy kan die hier lees. Dieselfde argumente kan grotendeels ook op die vier van die ander Christelike dae van toepassing gemaak word.

GRYS AREAS

Die Rom 14 beginsel

Die Rom 14 beginsel dek alle sake wat nie duidelik deur die Skrif toegelaat of verbied word nie (‘die kategorie van twyfelagtige dinge’ of grys areas). Ons glo dat aangesien die Skrif nie kwessies soos die Covid 19 inenting, ‘begrawe of veras’, die viering van Kersfees ens. duidelik opklaar nie; dit val onder die ‘kategorie van twyfelagtige dinge’ wat deur die beginsels van Romeine 14 en 1 Korintiërs 8 en 9 gedek word. Samevattend leer hierdie gedeeltes ons die volgende beginsels:

• Elke gelowige moet in sy of haar eie denke oortuig word (Rom. 14: 5).
• Ons mag nie met minagting oordeel of na ander kyk wat nie tot dieselfde gevolgtrekking kom as ons nie (Rom. 14: 3, 4, 13).
• Net soos daar niks fout mee is om begrawe of veras te word nie, so is daar in die tradisionele Kersfees niks fout met die boom, geskenke, kersliedere en versierings nie. Sulke dinge word wat mense hulle maak deur hul eie houding en oortuigings (Rom. 14: 22-23; 1 Kor. 8: 4-8; 10:19). Let wel dat ek nie hierdeur spesifiek die Kersvader en mites rondom Kersfees bv. goedkeur of goedpraat nie. Ons vier bv. self Kersfees deur te fokus op Christus se geboorte en deur die Kersverhaal in die Bybel aan ons kinders te leer, wat opvoerings daaroor insluit, i.p.v. op bv. die hele Kersvader mite. As jy in jou hart oortuig voel om dit te vier of nie te vier nie, doen dit dan met die grootste gerustheid en oortuiging. Al wat die Woord leer, is dat indien jy persoonlik sou besluit om iets as sonde te ag en dit daarna tog doen, dit as sonde vir jou toegereken sal word.

Die uiteindelike kwessie is ons fokus (bv. sou die mening wat jy hieroor huldig en die wyse waarop jy dit verbaliseer, ‘n ongelowige van Jesus se liefde kon oortuig?); ons houding, die redes hoekom en die wyse hoe ons besluit om bv. die Kerstyd te vier of om ‘n Covid inenting te neem of nie.

Aan die einde moet ons onthou: Dit is Jesus alleen wat ‘n verlore siel red; nie Covid inspuitings nie, nie ‘n veraste liggaam nie en sekerlik ook nie die hou of nie-hou van sekere dae of feeste nie. Indien jy self in jou eie gemoed oortuig voel oor n saak wat eintlik in die kategorie van twyfelagtige dinge val; moenie jou ander broeders of susters oordeel wat ‘n ander siening daaroor huldig nie.